Tungod sa paspas ug dali nga pagtubag sa Cortes Municipal Police Station (MPS) sa Bohol Police Provincial Office (BPPO), luwas nga nabalik sa iyang pamilya ang usa ka menor de edad nga nawala ngq nakit-ang nagsuroy-suroy sa karsada sa Barangay Malayo Norte, Cortes, kaniadtong Agosto 19, 2025.
Alas-2:00 sa hapon, usa ka nagpakabana nga residente ang miduol sa nagpapatrolya nga kapulisan ug mipahibalo mahitungod sa usa ka bata nga nag-inusara sa daplin sa karsada. Dali nga niresponde ang mga pulis ug ilang nakit-an ang bata nga klaro nga nalibog, hugaw ang sinina, ug nagbitbit og gamay nga bag.
Wala kini motubag sa mga pangutana sa Women and Children Protection Desk (WCPD), apan sa pagsusi sa sulod sa bag, nakuha ang usa ka identification card nga nagpakita sa iyang ngalan, address sa Pondol, Loon, Bohol, ug pangalan sa iyang amahan.
Human niini, nakig-alayon sa Cortes MPS ang Loon MPS, Municipal Social Development and Welfare Office (MSDWO), ug mga opisyal sa Barangay Pondol. Tungod sa koordinasyon, nakontak dayon ang pamilya sa bata ug napahibalo nga luwas kini nga anaa sa kustodiya sa kapulisan.
Pag-abot sa alas-6:00 sa gabii, miabot ang ginikanan sa stasyon sa pulis ug dako ang kalipay sa pagkakaplag sa ilang anak.
Gidayeg ni Police Brigadier General Redrico A. Maranan, Regional Director sa Police Regional Office 7 (PRO-7), ang paspas ug tinud-anay nga aksyon sa kapulisan.
Gisiguro usab sa PRO-7 nga magpadayon ang kapulisan sa pagtutok sa proteksyon sa kabataan ug uban pang sektor batok sa pang-abuso samtang gipalig-on ang pakigtambayayong sa lokal nga panggamhanan ug komunidad aron mapadayon ang kalinaw ug kahapsay sa Central Visayas.
Source: PRO7-PIO
I via Renante Socia Lada
#rpndykccebu