Usa ka 19-anyos nga lalaki ang patay diha-diha dayon samtang duha pa ang naangol, lakip na ang usa ka maestro, human mibangga ang motorsiklo nga ilang gisakyan sa pader sayo sa buntag, Huwebes, Agosto 21, 2025, sa Barangay Mohon, Talisay City.
Ang namatay giila nga si Jay-ar, 19 anyos, samtang ang mga samdan mao si Dave Romboyong, 21 anyos, ug si Sundy Abauita, 39 anyos, usa ka public school teacher sa Lawaan 3 Elementary School. Ang tulo pulos mga residente sa Barangay Lawaan 3 sa maong dakbayan.
Base sa imbestigasyon, gikan sa usa ka club sa Cebu City ang mga biktima ug samtang nanguli pasado alas 4 sa kadlawon, miagi sila sa Talisay aron mangita ug batchoy. Giingong misinsistir si Jay-ar nga siya ang modrive sa motorsiklo bisan wala kini hingpit nga kontrol sa manubela.
Tungod sa kusog nga dagan, nawad-an kini ug kontrol ug mibangga sa pader. Tungod sa kusog sa impact, grabe ang kadaot sa ulo ni Jay-ar nga hinungdan sa iyang kamatayon.
Si Dave nakasinati og trauma samtang si Abauita padayon nga gibantayan sa tambalanan ug giingong anaa sa kritikal nga kondisyon. Nagpadayon ang imbestigasyon sa kapulisan sa dakbayan sa Talisay kalabot sa nahitabong aksidente.
I via Renante Socia Lada