Duha ang patay human sa sunod-sunod nga disgrasya nga nahitabo pasado alas 2:00 sa kadlawon, Miyerkules, Agosto 20, sa MJ Cuenco Avenue, Barangay Hipodromo, Cebu City.
Ang pedestrian nga giila nga si Meljohn Calinajan, 25, una nga nadam-agan sa motorsiklo nga gi-drive ni Arnold Senarillos Andraque, 29, taga-Consolacion. Tungod sa impact, nalagpot si Calinajan paingon sa 10-wheeler Sinotruk nga gimaneho ni Oscar Lagsaan Dumotan, 54, nga taga-Compostela. Naligsan kini sa trak ug namatay diha-diha dayon.
Si Andraque, nga nagmaneho sa iyang blue Suzuki Smash, usab namatay human siya malagpot ug mabunal sa semento. Matod sa mga awtoridad, kusog ang dagan sa motorsiklo hinungdan nga grabe ang iyang kadaot.
Samtang, si Dumotan, nga nagdala ug feeds padulong sa Dumanjug, miangkon nga nakadungog siya ug pagpaka apan nagtuo nga gikan ra kini sa motorsiklo. Wala siya makabantay nga naligsan na niya si Calinajan tungod kay taas ug habog ang iyang gimaneho nga behikulo.
Ang truck driver gilutos sa usa ka traffic enforcer ug nasakpan duol sa simbahan sa Mabolo. Gikustodiya siya sa kapulisan ug pasakaan og kaso nga Reckless Imprudence Resulting in Homicide.
I via Renante Socia Lada