Nadakpan sa mga Barangay Tanod ang tulo ka lalaki nga nasakpan mismo sa akto sa pagkawat og water meter sa Metro Cebu Water District (MCWD) sa sayong kabuntagon sa Abril 11, 2026 sa Purok Proper 1, Brgy. San Vicente, Liloan.
Ang operasyon gipangunahan ni Chief Tanod Julito Quilantang uban sa mga tanod sa barangay samtang nagpatrolya sila sa lugar. Ang mga suspek giila nga sila Raymond, 37 anyos ug usa ka tricycle driver; Roel, 23 anyos; ug Gerald, 22 anyos. Ang duha sa mga suspek giingong mga ex-convict ug pulos residente sa lain-laing barangay sa Liloan ug silingang lungsod.
Diha-diha dayon nangayo og tabang ang mga tanod sa Liloan Police Station, ug mitubag si Duty Investigator PEMS Eutiquio Prosia Jr. Sa pag-abot sa kapulisan, ilang narekober gikan sa mga suspek ang duha ka MCWD water meter, usa ka adjustable wrench, ug usa ka tricycle nga gigamit sa krimen.
Sa dugang imbestigasyon, nakit-an usab gikan kang Gerald ang usa ka caliber .22 revolver nga adunay unom ka buhing bala, nga paglapas sa Republic Act No. 10591.
Ang mga nadakpan gidala sa Liloan Police Station alang sa hustong dokumentasyon ug pagpasaka og kaso batok kanila. Sumala sa kapulisan, ang maong operasyon kabahin sa padayon nga implementasyon sa Oplan Bakal, Sita, Bulabog ug curfew enforcement aron mapalig-on ang seguridad sa komunidad.
Source: Liloan MPS
I via Renante Socia Lada