Gipahibalo sa Police Regional Office 7 (PRO-7) nga malinawon ang pagsaulog sa Bag-ong Tuig sa tibuok rehiyon sa Central Visayas.
Sumala ni PBGEN Roy B. Parena, ang Officer-in-Command sa PRO-7, ang maayong kahimanan, pag-inspeksyon, ug ang pagpataas sa pagbantay sa mga miyembro sa kapulisan nakatabang kaayo sa pagmintinar sa kahapsay ug kaluwasan sa panahon sa selebrasyon. Aron nakaseguro sa hapsay nga pagsugod sa Bag-ong Tuig.
Isip kabahin sa programa nga “Ligtas Paskuhan 2024,” ang monitoring gikan Disyembre 31, 2024, hangtod Enero 1, 2025, nagpakita nga upat ra ka insidente nga may kalambigitan sa pabuto ang natala sa maong panahon.
Tulo ka samdan: Nahitabo sa Barangay Looc, Mandaue City; Babag 2, Lapu-Lapu City; ug Barangay Balisong, Argao, Cebu.
Usa ka namatay: Usa ka 23-anyos nga residente sa Barangay San Roque, Asturias, Cebu ang namatay human nabuthan ang nawong niini sa pabuto nga “bombshell.” Ang maong pabuto wala nibuto sa una, ug sa dihang giduol kini sa biktima aron susihon, kalit kining nibuto, nga maoy hinungdan sa aksidenti. Dali kining gidala
sa tambalanan apan gi deklarar kini nga wala nay kinabuhi.
Dugang pa, natala usab ang tulo ka insidente nga nalambigit sa ilegal nga pagpamaligya ug paggamit sa mga gidili nga pabuto ug pyrotechnic devices sa Danao City ug Lapu-Lapu City niadtong Disyembre 31, 2024.
Matod ni PBGEN Parena, ang kalinaw atol sa selebrasyon resulta sa istratehiya ug kooperasyon tali sa PRO-7 ug sa mga lokal nga komunidad. Ang mga programa sa seguridad ug ang paghatag og impormasyon kabahin sa kaluwasan sa publiko makatabang aron malikayan ang mga insidente sa umaabot.
“The New Year celebrations in Central Visayas were peaceful, largely due to the strategies implemented by PRO-7, along with local support. These actions included thorough inspections and the distribution of safety guidelines to the public, which helped maintain peace in the region,” segon ni PBGen Parena.
Dugang pa niya, kini nga pamaagi mahimo’g timailhan alang sa mas maayong ka a dam ug kaluwasan sa mga umaabot nga kalihokan.
Source: PRO-7, PIO
I via Renante Socia Lada
#rpndykccebu
#675hzamband
#mrpublicservice