Nikutlo og usa ka kinabuhi ug niangol ang disgrasya sa pabuto human gipunit ang pabuto.
Ang trahedya nahitabo sa Purok Camunggay, Barangay Candulawan, Talisay City, Cebu, mga alas 1:00 sa kaadlawon sa Enero 1, 2025. Ang biktima, usa ka 10-anyos nga batang lalaki nga estudyante sa Candulawan Elementary School, namatay diha-diha human naigo sa mga tipak sa binuak nga tiles ug bato nga nitusok sa iyang dughan, nga milahos sa iyang kasingkasing.
Upat ka uban niya nga mga bata—duha ka 10-anyos, usa ka 16-anyos, ug usa ka 8-anyos—ang naangol sa insidente. Ang 16-anyos nga bata naghuho sa pulbura gikan sa wala mobuto nga “Goodbye Philippines” nga ilang napunitan. Gipalawman nila kini sa mga binuak nga tiles ug bato, unya gidakdakan og laing bato, hinungdan sa kusog nga pagbuto nga nakatay-og sa yuta.
Ang mga naangol gidala sa Cebu South Medical Center. Kritikal ang kahimtang sa 8-anyos nga bata tungod sa grabeng kadaot sa iyang mata, dapi-dapi, ug uban pang parte sa lawas. Ang 16-anyos kinahanglan operahan tungod kay naigo ang iyang itlog sa kinatawo, samtang ang usa sa mga 10-anyos naukab ang tuhod.
Gipangita na karon sa kapolisan ang 20-anyos nga lalaki nga unang nipabuto sa “Goodbye Philippines” aron patubagon siya sa iyang gihimo, sanglit bawal ang maong pabuto.
Ang “Goodbye Philippines” usa ka iligal nga pabuto nga gihulagway nga delikado ug makamatay. Ang paggamit niini resulta sa seryosong kadaot ug kamatayon, sama sa nahitabo sa maong insidente.
Ang mga otoridad nag-awhag sa publiko nga likayan ang paggamit sa mga iligal nga pabuto aron malikayan ang susamang mga insidente. Gipahinumduman usab ang mga ginikanan nga bantayan ang ilang mga anak ug ipasabot ang peligro sa paggamit sa mga delikadong pabuto.
📸 CTTO
I via Renante Socia Lada