Nagpadayon ang kampanya sa Police Regional Office 7 (PRO-7) batok sa iligal nga drogas human makasikop og 174 ka drug suspects ug nasakmit ang 788.38 gramos nga ginadiling drogas nga nagkantidad og Php5,360,984.00 atol sa tulo ka adlaw nga simultaneous police operations gikan Marso 17 hangtod Marso 19, 2025.
Pinaagi sa mga buy-bust operations, naputol sa PRO-7 ang mga drug networks nga naglihok sa Central Visayas. Kini nagpakita sa padayong paningkamot sa kapulisan aron mapalig-on ang seguridad sa katawhan ug mapapas ang hulga sa ginadiling droga.
Si PBGEN Redrico A. Maranan, Regional Director sa PRO-7, mipasidungog sa mga law enforcement personnel tungod sa ilang kakugi ug mipasalig nga magpadayon ang kampanya batok sa droga.
Ang mga nadakpan pasakaan og kaso ubos sa RA 9165 o ang “Comprehensive Dangerous Drugs Act of 2002”, samtang ang nakumpiskang droga ipailawom sa laboratory analysis alang sa saktong dokumentasyon sa kaso.
Dugang pa, nagpadayon ang follow-up operations aron masuta ug madakpan ang mga supplier ug key figures nga nagpaluyo sa pagpakatap sa ginadiling drogas. (Renante Socia Lada)
(Source: PRO-7, PIO)