Padayon ang hugot nga kampanya sa Police Regional Office 7 (PRO-7) batok sa ilegal nga armas human masakmit ang 192 ka walay rehistrong pusil atol sa tulo ka adlaw nga operasyon nga gipahigayon gikan Marso 17 hangtod Marso 19, 2025 sa tibuok rehiyon.
Kini nga operasyon kabahin sa paningkamot sa PRO-7 nga mapakunhod ang mga insidente sa kalabot sa armas ug mapalig-on ang pagsunod sa election-related firearm regulations.
Tungod kay hapit na ang eleksyon, mas gipakusgan pa sa PRO-7 ang ilang law enforcement operations, lakip ang pagpatuman sa search warrants, 24/7 checkpoints, ug intelligence-driven operations, aron mapugngan ang iligal nga paggamit sa mga ilegal nga armas, labi na kadtong mahimong magamit sa election-related violence.
Magpadayon kini nga mga operasyon sa sunod nga mga semana aron masiguro ang hapsay ug malinawon nga eleksyon.
Si PRO-7 Regional Director PBGEN Redrico A. Maranan mipasabot nga ang ilang operasyon batok sa ilegal nga armas dili lang usa ka makausa nga paningkamot kundi usa ka padayon nga kampanya aron maseguro ang kasiguruhan sa publiko.
Sa maong operasyon, 24 ka mga indibidwal ang nadakpan ug pasakaan og kasong iligal nga pagpanag-iya og armas ug paglapas sa COMELEC Gun Ban. Subay sa regulasyon sa COMELEC, mahugot nga ginadili ang walay otorisadong pagdala ug pagpanag-iya og armas atol sa election period, ug ang mga malapason silotan sumala sa balaod.
Ang tanang nakumpiskang armas ipailawom sa forensic examination aron masuta kung nalambigit ba kini sa mga naglabay nga krimen. Samtang nagpadayon ang operasyon, nag-awhag ang PRO-7 sa publiko nga ipahibalo sa mga otoridad kung adunay impormasyon mahitungod sa mga iligal nga armas o mga hulga sa seguridad nga may kalabotan sa eleksyon.
Sa padayon nga kampanya batok sa loose firearms, gipasalig sa PRO-7 nga magpabilin silang mabinantayon sa ilang misyon nga ipatuman ang balaod ug protektahan ang kalinaw ug kasiguruhan sa Central Visayas sa wala pa, sa panahon, ug human sa eleksyon. (Renante Socia Lada)
(Source: PRO-7, PIO)