Sa padayong paningkamot nga masiguro ang kalinaw ug kahapsay sa rehiyon sa Central Visayas, ilabi na samtang nagkadool ang bag-ong tuig ug ang Sinulog festival, gipahibawo sa Police Regional Office 7 ang malampuson nga operasyon niini sa milabay’ng semana.
Ang maong mga operasyon nakakuha ug iligal nga drogas nga gibanabanang nagkantidad ug PHP 36.3 milyon ug nisikop sa 385 ka mga indibidwal tungod sa nagkalain-laing kalapasan.
Sukad Disyembre 22 hangtod Disyembre 28, 2024, nakompiska sa mga kapulisan ang 5.3 ka kilo nga iligal nga droga nga nagkantidad ug PHP 36,339,460, lakip na ang mga drug paraphernalia, nga niresulta sa pagkasikop sa 140 ka mga suspetsado nga may kalambigitan sa drogas.
Sa maong panahon, gipalig-on usab ang kampanya batok iligal nga sugal nga nisangpot sa pagsakmit sa PHP 11,849 nga sugal ug pagkasikoo sa 156 ka mga tawo.
Dugang pa, nasikop sa mga awtoridad ang 11 ka labing gipangita nga mga suspek ug 61 ka laing wanted pinaagi sa pagpatuman sa mga warrant of arrest.
Ang mga operasyon nakasakmit usab ug 60 ka wala narehistrong pusil, tulo ka eksplosibo, ug nagkalain-laing klase sa bala.
“We have been extensively preparing and have adjusted our security strategies in anticipation of the New Year celebrations and the upcoming Sinulog festivities. PRO-7 is committed to maintaining the highest standards of service and professionalism in our mission to protect the people of Central Visayas,” segon ni PRO-7 Officer-In-Command PBGEn Roy Parena.
Ang tanang mga nasikop anaa karon sa kustodiya sa kapulisan ug mag-atubang sa mga kaso sa korte. (Renante Socia Lada)
(Source: PRO-7 PIO)