Ang Police Regional Office 7 nagpalig-on sa pagpatuman sa nasudnong gun ban. Sulod sa mga operasyon ug patrol, nadakpan ang 35 ka tao nga nalapas sa balaod ug nakompiska ang 35 ka armas.
Sumala sa datos sa PRO7 Regional Monitoring Action Center (REMAC), gikan Enero 12 hangtod Enero 20, 2025, nadakpan ang 35 ka indibidwal ug nakuha ang mga armas nga wala marehistro. Lakip sa nakompiska mao ang 13 ka pistola, 22 ka rebolber, ug nagkalain-laing bala.
Nakapahimutang usab og 3,591 ka joint checkpoints ang PRO7 pinaagi sa kooperasyon sa Commission on Elections Region 7, Philippine National Police, ug Armed Forces of the Philippines. Ang mga checkpoint nga naglakip sa strategic, spot/mobile, ug border control operasyon gitumong aron mapalambo ang patas ug luwas nga eleksyon karong Mayo 2025.
Sumala ni PRO7 Regional Director PBGen Redrico Maranan, ang PRO7 nagpalig-on sa kampanya batok sa mga loose firearms sa Central Visayas isip usa ka lakang alang sa seguridad sa umaabot nga eleksyon.
Gidasig usab niya ang mga tag-iya og armas nga expired na ang lisensya o wala narehistro nga magpasakop ug isurrender ang ilang armas ngadto sa otoridad alang sa maayong paggamit ug kaluwasan.
📸 PRO-7
I via Renante Socia Lada