Kaniadtong Huwebes, Enero 23, 2025, nasakmit sa mga awtoridad sa Pier 4, Dakbayan sa Sugbo, ang gibana-banang P170 milyon nga kantidad sa gidudahang shabu. Ang mga suspetsado mao ang 41-anyos nga si Edward Roche Loga, usa ka drayber nga taga-Isabel, Leyte, ug ang iyang 63-anyos nga inahan nga si Edna Roche Loga nga taga-Ermita, Dakbayan sa Sugbo.
Sumala sa taho, ang inahan ug anak gikan sa Masbate ug gisakay ang ilegal nga drogas padulong sa Sugbo. Sa pier, ilang gilikayan ang inspeksyon sa K9 unit sa Philippine Drug Enforcement Agency (PDEA), apan nadakpan sila. Sa sulod sa ilang sakyanan, nakit-an ang 25 ka kilo sa gidudahang shabu nga gibutang sa usa ka garbage bag sulod sa usa ka brown nga kahon.
Ang mga suspetsado karon gitanggong samtang giandam ang mga kaso batok kanila ubos sa Republic Act No. 9165 o ang Dangerous Drugs Act. Si Edward Loga miangkon nga gisugo ra siya sa pagdala sa sakyanan gikan sa Masbate ngadto sa Sugbo ug wala kahibalo nga adunay drogas sulod niini. Gisaad siya og P20,000 alang sa delivery.
Nagtuo ang mga awtoridad nga usa ka dako nga sindikato ang nalambigit sa operasyon tungod sa kadako sa kantidad sa nadakpang drogas. Kini nga operasyon giila nga usa ka dakong kadaugan alang sa kampanya batok sa ilegal nga droga sa rehiyon.
I via Renante Socia Lada