Nagpagawas og pahimangno ang Cebu Police Provincial Office (CPPO) ngadto sa publiko aron masiguro ang kaluwasan sa tanang residente atol sa hulga sa bagyo ug kusog nga ulan.
Gidasig sa CPPO ang katawhan nga pirming magmatngon sa mga weather updates ug opisyal nga pahibalo gikan sa PAGASA ug lokal nga kagamhanan.
Importante usab nga andamon ang matag panimalay pinaagi sa paglig-on sa atop, bintana ug mga pultahan, samtang kinahanglan nga ibalhin sa sulod sa balay ang mga gamit nga mahimong mapalid sa kusog nga hangin.
Gipahinumdoman usab ang mga pamilya nga mag-andam og emergency kit nga adunay igo nga tubig, pagkaon, tambal, flashlight, baterya ug mga importanteng dokumento. Gidasig usab ang publiko nga siguruhong puno ang baterya sa ilang mga cellphone ug power bank aron magpadayon ang komunikasyon panahon sa emerhensiya.
Sumala sa CPPO, mas maayo nga magpabilin sulod sa balay samtang nagbagyo ug likayan ang pag-adto sa mga lugar nga gibahaan. Ang mga motorista ug mga pedestrian gitambagan nga dili molabang sa baha tungod sa posibleng peligro ug kalit nga pagsaka sa tubig.
Dugang pa niini, giawhag sa CPPO ang tanan nga motabang ug mopahibalo sa ilang mga silingan ilabi na sa mga tigulang, kabataan ug mga adunay espesyal nga panginahanglan.
Kinahanglan usab nga sundon dayon ang mga evacuation order ug ubang direktiba sa mga awtoridad aron malikayan ang kadaot ug mapanalipdan ang kinabuhi panahon sa kalamidad.
I via Renante Socia Lada