Padayon nga gipakusgan sa Cebu Police Provincial Office (CPPO) ang ilang kampanya batok sa kriminalidad ug alang sa kaluwasan sa publiko sa tibuok lalawigan sa Sugbo ubos sa pagpanguna ni Police Colonel Abubakar Udang Mangelen Jr. Sumala sa CPPO, daghang kalampusan ang ilang nakab-ot sa mga operasyon gikan Mayo 18 hangtod 24, 2026.
Sa kampanya batok sa ilegal nga drogas, nakahimo ang kapulisan og 36 ka operasyon nga misangpot sa pagkadakop sa 45 ka indibidwal.
Nakarekober usab sila og gibanabana nga 135.15 gramos nga gidudahang shabu nga nagkantidad og kapin ₱919,000. Nakapasaka usab og 79 ka kaso sa korte batok sa mga nadakpan.
Sa kampanya batok sa mga wanted person, nakaserbisyo ang CPPO og 32 ka warrant of arrest pinaagi sa 26 ka operasyon. Tungod niini, 26 ka wanted person ang nadakpan lakip ang pito ka Most Wanted Person ug 19 ka ubang wanted person.
Samtang sa kampanya batok sa ilegal nga armas, 10 ka operasyon ang gihimo nga misangpot sa pagkadakop sa siyam ka tawo ug pagkarekober sa siyam ka armas. Usa usab ka armas ang boluntaryong gitugyan sa kapulisan. Nakapasaka usab og siyam ka kaso batok sa mga nalambigit.
Gipalig-on usab sa CPPO ang kampanya batok sa ilegal nga sugal diin 22 ka mga violator ang nadakpan atol sa 18 ka operasyon. Nakumpiskar usab ang kapin ₱7,000 nga pusta ug gipasakaan og kaso ang mga nakalapas.
Dugang pa, padayon usab ang istriktong pagpatuman sa lokal nga ordinansa diin kapin 1,500 ka operasyon ang gihimo sa tibuok probinsiya. Tungod niini, 2,551 ka tawo ang gipamulta samtang 1,698 ang gipahimangnoan. Ang nakolektang multa miabot sa kapin ₱1.2 milyon.
Matod sa CPPO, nagpakita kini sa ilang lig-on nga paningkamot sa pagmintinar sa kalinaw ug kahapsay ug pagsiguro sa kaluwasan sa matag Sugboanon.
I via Renante Socia Lada