Nakadakop ang Police Regional Office 7 o PRO7 og kapin 411 ka indibidwal atol sa ilang gipakusog nga operasyon batok sa krimen ug ilegal nga mga kalihokan sa Central Visayas gikan Mayo 17 hangtod 23, 2026.
Sumala sa PRO7, kabahin kini sa kampanya sa Philippine National Police aron mapalig-on ang kalinaw ug seguridad sa komunidad pinaagi sa programang “Serbisyong Nararamdaman.”
Sa kampanya batok sa ilegal nga drogas, 191 ka tawo ang nadakpan, lakip na ang upat ka High-Value Individuals o HVI, upat ka Street-Level Individuals o SLI, ug 183 ka bag-ong nailhang drug personalities.
Narekober usab sa mga operatiba ang kapin 1,068 gramos nga gidudahang shabu nga nagkantidad og ₱7.2 milyon.
Sa kampanya batok sa mga wanted person, 89 ka pugante ang nasikop pinaagi sa pagserbisyo sa mga warrant of arrest. Lakip niini ang 16 ka Most Wanted Persons ug 73 ka Other Wanted Persons.
Dugang pa, 21 ka tawo usab ang nadakpan sa kampanya kontra loose firearms ug 52 ka armas ang narekober, lakip ang mga walay rehistro ug expired na ang permit ug lisensya.
Samtang sa kampanya batok sa ilegal nga sugal, 110 ka tawo ang nadakpan ug nakumpiska ang ₱21,951 nga kantidad sa mga pusta.
Matud pa ni PBGEN Arnold E. Abad, padayon nga palig-unon sa PRO7 ang ilang operasyon aron dili makahatag og hulga ang mga kriminal sa kalinaw ug seguridad sa katawhan sa Central Visayas.
I via Renante Socia Lada