Nagpakita og kusog nga presensya ug alertness ang kapulisan sa Minglanilla human madakpi ang duha ka lalaki nga giingong nagdala og armas ug iligal nga drogas sa Barangay Calajo-an, hapon sa Oktubre 30, 2025.
Ang insidente nagsugod sa usa ka tip gikan sa usa ka concern citizen, nga mi-report nga adunay duha ka lalaki nga armado ug naglibot-libot sa Sitio Lower. Dali nga miresponde ang mga operatiba sa Intel ug Drug Enforcement Unit sa Minglanilla Police Station aron tan-awon ang sitwasyon.
Pag-abot sa kapulisan, ilang nakita ang duha ka suspetsado nga nagbitbit og pusil ug giingong nagbuhat og kahasol sa publiko. Sa dihang gipaila sa mga pulis ang ilang kaugalingon, kalit nilang gipamusil sa mga suspek, hinungdan sa gamayng engkwentro nga misangpot sa pagkasamad ni John Edward Reroma, 24, samtang nadakpan buhi ang iyang kauban nga si Aljun Remillete, 29.
Gikan sa duha, narekober ang duha ka .38 caliber revolver, mga bala, ug labing 50.21 gramos nga gituohang shabu nga nagkantidad og kapin ₱341,000. Gituohan nga ang mga suspek posibleng nalambigit sa mas dako nga operasyon sa drogas sa habagatang bahin sa lalawigan.
Sumala sa kapulisan, ang ilang paspas nga aksyon ug koordinasyon sa mga residente maoy nakaresulta sa kalampusan sa operasyon. Ang duha karon gikatakdang pasakaan og kaso kalabot sa iligal nga drogas ug armas, samtang nagpadayon ang imbestigasyon aron mahibal-an kung adunay laing nalambigit.
I via Renante Socia Lada