Nadakpan sa usa ka joint buy-bust operation sa kapulisan sa Police Regional Office 7 (PRO7) ang usa ka suspetsado nga tigbaligya ug pusil nga walay lisensya niadtong Oktubre 29, 2025, didto sa kanto sa JP Rizal ug Juan Luna Streets, Barangay Poblacion, Danao City.
Ang operasyon gipangulohan sa Regional Special Operations Unit 7 (RSOU7) uban ang Regional Intelligence Division 7 (RID7), Danao City Police Station, ug Police Intelligence Unit sa CCPO, ug gisugdan pasado alas-9:30 sa gabii.
Nasakmit sa operasyon ang duha ka caliber .45 pistols ug duha ka magasin. Ang suspetsado wala makapakita ug dokumento nga naghatag kaniya og otoridad sa pagkupot, pagbaligya, o pagpanag-iya og armas — lakip na ang License to Own and Possess Firearms (LTOPF) ug Permit to Carry Firearm Outside Residence (PTCFOR).
Ang mga nasakmit nga armas gipasaka sa PNP Crime Laboratory Office 7 aron ipaubos sa forensic examination, samtang ang suspetsado kasamtangang gitanggong ug pasakaan og angay nga kaso sa korte.
Sa pamahayag ni PBGEN Redrico A. Maranan, Regional Director sa PRO7, iyang gidayeg ang kalampusan sa operasyon ug gipasiugda ang padayon nga kampanya batok sa iligal nga armas.
Gidugang pa niya nga padayon silang maningkamot nga masakmit ang tanan nga iligal nga armas ug mga nagtago nga pabrika niini.
Ang maong kampanya, matod ni Maranan, usa ka kabahin sa direktiba sa Chief PNP aron mapanalipdan ang seguridad ug kalinaw sa rehiyon, ug magpabiling una ang kaluwasan sa katawhan sa misyon sa kapulisan.
Source: PRO7 PIO
I via Renante Socia Lada