Sa pag-abot sa Bag-ong Tuig, nagpagawas og pahimangno ang Philippine National Police (PNP) aron masiguro ang kaluwasan sa publiko batok sa mga aksidente nga dala sa dili husto nga paggamit ug pagbaligya sa mga pabuto.
Gipahinumduman sa PNP nga ang mga namaligya sa pabuto kinahanglan adunay legal nga permiso gikan sa munisipyo o city hall ug magpabiling mosunod sa ordinansa sa syudad.
Ang paggamit ug baligya sa pabuto gitugotan lamang sa designated areas aron malikayan ang sunog ug disgrasya.
Gidili usab ang pagbaligya sa mga pabuto sa mga sari-sari store, sidewalk, ug uban pang dili awtorisado nga tindahan. Ang mga tindahan nga gibaligyaan kinahanglan adunay safety equipment sama sa fire extinguisher, balde sa tubig o balas, ug klarong “No Smoking” signage.
Labaw pa, gibawal usab ang paggamit sa mga improvised nga pabuto sama sa Lantaka ug Boga, nga kasagarang gamiton sa barangay ug kadalanan.
Gipahimangnoan ang mga ginikanan nga giyahan ang ilang mga anak sa husto nga paggamit sa pabuto ug likayan ang pagsiga sa mga nagamit na apan wala mobuto.
Ang publiko gidasig nga magpabiling mabinantayon ug ireport dayon ang mga emerhensiya sa PNP Hotline 911 o EOD Unit 7 sa 0966 450 7626.
Giklaro sa PNP nga ang mga maong pahimangno gimugna aron masiguro ang malinawon ug luwas nga pagsaulog sa Bag-ong Tuig. (Renante Socia Lada)Â