Nasikop ang duha ka managsuon atol sa usa ka buy-bust operation nga gihimo sa mga kapolisan sa Municipal Drug Enforcement Unit sa Purok Kamunggay, Sitio Dapdap, Barangay Catarman, niadtong Disyembre 29, 2024, sa mga alas 11:30 sa buntag.
Pinangulohan ni PMAJ Mawi C. Arcilla, Office-in-Charge sa Liloan Municipal Police Station, ang maong operasyon nga nagresulta sa pagkumpiska sa tulo (3) ka medium-size nga pakete sa gituohang shabu nga andam na unta ibaligya, ug usa pa ka medium-size nga pakete nga naangkon sa ilang posisyon.
Ang duha ka suspetsado, nga giingong konektado usab sa pagpamaligya sa droga sa kasilingang munisipyo sa Compostela, dugay na nga gibantayan sa awtoridad human sa reklamo ug impormasyon gikan sa mga residente.
Nagpasalamat ang kapolisan sa hugot nga kooperasyon sa mga lumulupyo sa Barangay Catarman, ilabi na sa mga opisyal ug barangay tanod, nga mipadayag sa ilang suporta aron masugpo ang iligal nga kalihokan.
Sumala pa ni PMAJ Arcilla, ang suporta sa komunidad maoy hinungdan sa kalampusan sa kampanya batok sa droga, ug kini magapadayon hangtod nga mahunong ang mga iligal nga kalihokan sa lugar. (Renante Socia Lada)