Nakalas ang usa ka rider human sa grabeng panagbangga tali sa motorsiklo ug usa ka pick-up truck nga nahitabo kaganihang tungang gabii sa M.J. Cuenco Avenue, Barangay Hipodromo, Cebu City, atbang sa Kaye Floral Shop. Dead on arrival ang biktima pag-abot sa Cebu City Medical Center (CCMC).
Ang namatay nailhan nga si Jan Jan Lujera Salubre, 29 anyos, residente sa 306 Kennedy Street, Barangay Hipodromo. Grabe ang mga samad nga iyang naangkon tungod sa kusog nga impact sa panagbangga nga maoy hinungdan sa iyang kamatayon.
Base sa inisyal nga report sa kapulisan, ang motorsiklo nga gimaneho ni Salubre nabanggaan sa usa ka Ford Ranger pick-up nga gimaneho ni Joefel Anova Avila, 34 anyos, ulitawo ug residente sa Bayabas Street, Barangay Mambaling, Cebu City.
Matud sa mga saksi, nagkasugat ang duha ka sakyanan nga gikan sa managlahi nga direksyon, ang motorsiklo padulong sa habagatang bahin samtang ang pick-up padulong sa amihanan. Giingon nga misulod sa pikas linya o nag-counterflow ang pick-up truck nga maoy hinungdan sa aksidente.
Samtang, sumala sa Traffic Enforcement Unit (TEU) sa Cebu City Police Office (CCPO), gi-detain na ang drayber sa Ford Ranger aron ipailalom sa dugang nga imbestigasyon ug aron mahibal-an ang eksaktong hinungdan sa insidente ug ang angay nga kasong ipasaka.
I via Renante Socia Lada