Nasikop sa National Bureau of Investigation–Central Visayas Regional Office (NBI-7) ang upat ka personalidad human sa usa ka malampusong entrapment operation nga gihimo niadtong niaging hapon sa usa ka lawak sa Siyudad sa Sugbo.
Giila sa NBI ang mga nadakpan nga sila Janice Chu Dy, Rowena Orti Abella, Edgardo Ang Cayanes, ug Mark Dominick Avetajado Villaluz. Ang operasyon misunod sa reklamo sa usa ka negosyante nga si Reymark Arsolon, taga Barangay Bakilid, Dakbayan sa Mandaue.
Sumala sa imbestigasyon, nabiktima si Arsolon sa usa ka real estate scam nga nagkantidad og ₱4 milyones pesos may kalabutan sa gituohang property mortgage sa Barangay Mambaling, Cebu City. Nasuta nga peke ang mga dokumento ug titulo sa yuta nga gipakita sa mga suspek.
Gigamit sa NBI-7 ang ₱500,000 nga marked money isip paon sa entrapment nga misangpot sa ilang pagkadakop. Karon, gitanggong na ang mga suspek sa NBI-7 ug mag-atubang og kasong estafa ug falsification of public document.
Gisuta pa usab kung ang mfa suspetsado aduna bay laing nabiktima, awhag sa mga otoridad nga kung na biktima makig-alayon sa ilang buhatan.
I via Renante Socia Lada