Padayon ang kusog nga kampanya sa Police Regional Office 7 (PRO7) batok sa iligal nga drogas. Hangtod Disyembre 5, 2025, 1,617 ka barangay o 71.4% sa tanang barangay nga apektado sa drogas sa Central Visayas ang gideklarar nga drug-cleared.
Sumala sa PRO7, sa miting sa Regional Oversight Committee on Barangay Drug Clearing (ROC-BDC) niadtong Nobyembre 24, 2025 sa Tagbilaran City, Bohol, unom ka dugang nga barangay ang opisyal nga giila nga drug-cleared. Kini resulta sa hapsay nga intelihensiya, pakigtambayayong sa komunidad, ug padayon nga pagmonitor sa kapulisan.
Sa 659 ka barangay nga nabilin, 230 ang giisip nga gamay ra’g epekto sa drogas, 400 ang medium ang lebel sa problema, samtang 29 ang seryoso kaayo. Matud sa PRO7, lain-laing pamaagi ang gigamit depende sa kahimtangan sa matag barangay.
Miingon si PBGEN Redrico A. Maranan, Regional Director sa PRO7, nga ang 71.4% nga kalampusan bunga sa tinabangay nga plano, walay undang nga operasyon, ug dedikasyon sa kapulisan ug komunidad. Apan iyang giingon nga kinahanglan pa ipadayon ang paningkamot aron walay barangay nga mapabilin.
Gipasiugda usab ni PBGEN Maranan nga ang Barangay Drug Clearing Program dili lang kampanya batok sa drogas, kundili usa ka paningkamot alang sa kalinaw, kaluwasan sa katawhan, ug lig-on nga komunidad.
Padayon ang PRO7 sa ilang tumong nga drug-free ug luwas nga Central Visayas alang sa tanang molupyo.
Source: PRO7 PIO
I via Renante Socia Lada