Nangandam na ang Cebu Provincial Health Office (PHO) aron mapanalipdan ang panglawas sa mga residente human sa pag-ulan og abo gikan sa Bulkang Kanlaon.
Gipasidan-an sa PHO nga delikado ang pino nga abo kay dali kining masuyop ug makaabot sa sulod sa baga.
Matod ni PHO Chief Dr. Sheila Shy Faciol, nagpadayon ang ilang koordinasyon sa mga municipal ug city health offices, ilabina sa kasadpang bahin sa Sugbo, aron dali makatubag kung adunay mga maapektuhan sa ashfall.
Gipasabot usab ni Faciol nga ang mga bata, tigulang, buntis, ug mga adunay daan nang sakit sa pagginhawa mao ang labing delikado nga maapektuhan sa abo sa bulkan. Giawhag ang publiko nga maglikay sa paglanghap sa abo ug magsul-ob og mask kung mogawas.
Tungod sa mando ni Gobernadora Pamela Baricuatro, giandam na sa PHO ang mga ospital sa Balamban, Pinamungahan, Barili, ug Carcar City alang sa posibleng pagdaghan sa mga pasyente nga adunay sintomas sa sakit sa pagginhawa.
Nagpalit usab ang kapitolyo og 6,000 ka N95 masks nga ipang-apod-apod sa mga apektadong lokal nga panggamhanan, samtang adunay dugang nga suplay nga paabot sa umaabot nga mga adlaw.
I via Renante Socia Lada