Nanawagan ang Cebu Provincial Agriculture Office (PAO) sa tanang mag-uuma sa probinsya nga daling ireport ang bisan unsang kadaot sa ilang mga tanom tungod sa ashfall gikan sa Bulkang Kanlaon aron makabenepisyo sa libreng crop insurance nga gihatag sa Cebu Provincial Government.
Matod ni Provincial Agriculturist Roldan Saragena, walay bayranan ang mga kwalipikadong mag-uuma kay ang Kapitolyo mismo ang mobayad sa insurance premium. Ang kantidad sa makuha nga ayuda magdepende sa gidak-on sa kadaot nga mapamatud-an sa assessment.
Pananglitan, ang mga mag-uuma og humay mahimong makadawat og hangtod ₱25,000 matag ektarya, samtang ang adunay insured nga mga punoan sa mangga mahimong makadawat og mga ₱5,000 matag punoan kon kini madaot.
Giawhag usab sa PAO ang mga wala pa naka-enrol sa crop insurance program nga magparehistro pinaagi sa ilang municipal o city agriculture office aron mapanalipdan ang ilang panginabuhian batok sa mga kalamidad sama sa ashfall ug uban pang natural nga katalagman.
I via Renante Socia Lada