Gilusad karong adlawa ang PhilHealth YAKAP (Yaman ng Kalusugan Program) nga naghatag ug mas lapad nga serbisyo medikal alang sa tanang Pilipino. Ang programa nagpalapad sa PhilHealth Konsulta Program aron mas daghang tambal ug medical tests ang magamit sa publiko.
Kaniadto, 21 ra ka klase nga tambal ang libre, apan karon 75 essential medicines na. Ang laboratory tests gikan sa 15, niabot na sa 20 ka klase, ug adunay libre nga cancer screening para sa breast, colorectal, liver, ug lung cancers.
Si Mayor Jonkie Ouano mipahibalo nga ang dakbayan nagdeploy og 27 ka encoders sa 27 ka barangay health centers ug nagdugang og 30 ka bag-ong Barangay Health Workers aron mas mapalig-on ang frontline health services. Gipondohan usab ang pagpalit og ₱25 milyon nga tambal ug medical supplies ug laing ₱10 milyon alang lamang sa barangay health centers.
Sunod tuig, sugdan ang pagtukod sa bag-ong Mandaue City Hospital ug usa ka 3-storey Supra Health Center nga adunay City Birthing Center.
Ang kalihukan gitambongan sa mga opisyal sa dakbayan, kapitanes sa barangay, provincial officials, ug mga representante sa Department of Health ug PhilHealth.
Source: Cong. Ouano-Dizon