Nibisita sa buhatan ni Mayor Nestor Archival karong Miyerkules, Agosto 27, 2025, ang grupo gikan sa Department of Science and Technology–Food and Nutrition Research Institute (DOST-FNRI) nga nagpahigayon og survey kabahin sa nutrisyon ug kahimsog sa mga residente sa dakbayan.
Matod ni Danielle Hannah Marasigan, Project Technical Specialist, target unta nila ang 529 ka panimalay nga gi-endorsar sa Philippine Statistics Authority (PSA), apan 395 ra ang mitubag sa survey. Sa 80 ka barangay sa Cebu City, 23 ra ang ilang nasakop nga kasagaran naa sa lowland areas. Gisugdan ang survey niadtong Agosto 15 ug natapos karong adlawa, Agosto 27.
Ang survey naglakip sa pagkuha og body measurements sama sa gitas-on, timbang, ug blood pressure sa mga bata ug hamtong nga nag-edad og 8 anyos pataas. Lakip usab sa ilang gi-interbyu kung adunay gibati nga sakit sama sa diabetes, high blood pressure, cardiovascular disease, cancer, ug ang ilang lifestyle sama sa panigarilyo ug pag-inom.
Nagpasalamat ang DOST-FNRI sa tabang nga gihatag sa City Health Department ug City Nutrition Office sa paggiya kanila sa survey.
Ang 395 ka panimalay nga mitambong nakadawat og ₱1,000 nga insentibo gikan sa DOST-FNRI, apan giklaro nga usa ra ka higayon kini ug dili kini ayuda.
Source: Cebu City PIO