Usa ka lalaki ang nadakpan human masakpan nga nagdala og dili lisensiyadong armas sa Sitio Upper Kawayan, Barangay Sambag 2, Cebu City, alas 12:35 sa kadlawon, Disyembre 9, 2024
Ang dinakpan mao si Karl Jhon Baring Sacal, 28-anyos, residente sa maong lugar. Nadiskubrehan kaniya ang usa ka home-made .9mm caliber revolver nga walay serial number ug adunay tulo ka buhing bala.
Sumala sa report sa kapulisan, usa ka concerned citizen ang nitaho kabahin sa presensiya sa suspek nga armado ug nagpakita og agresibong pamatasan sa lugar. Ang Abellana Police Station dali nga niresponde sa maong impormasyon, hinungdan sa pagkasikop ni Sacal.
Gidala ang suspek sa Abellana Police Station aron atubangon ang kasong posibleng ipasaka batok kaniya, lakip na ang paglapas sa balaod sa pagdala og armas nga dili rehistrado.
Padayon ang kapulisan sa pag-awhag sa publiko nga magmatngon ug ipahibalo dayon ang mga kahina-hinalang kalihokan aron malikayan ang kriminalidad sa ilang komunidad. (Renante Socia Lada)