Giklaro sa Philippine Drug Enforcement Agency (PDEA)-7 nga wala silay na-monitor nga shabu laboratory dinhi sa dakbayan sa Sugbo. Ang maong kasayuran ilang gipadayag atol sa “2nd Quarter Cebu City Anti-Drug Abuse Council Meeting,” kagahapong adlawa, Hunyo 23, 2025, naglakip sa ilang assessment gikan Abril 1 hangtod Hunyo 15, 2025.
Sumala ni Investigation Agent Rey Davila, team leader sa PDEA-7 Regional Special Enforcement Team, kasagaran sa mga shabu nga masakmit sa dakbayan gikan pa sa Mindanao ug Luzon, ilabi na sa National Capital Region. Gikumpirmar kini pinaagi sa mga impormasyong nakuha sa mga nadakpan nga drug personalities.
Base sa ulat, ang PDEA-7 nakasakmit og 7,208.36 gramos nga shabu, 13,000 ka punoan ug 500 ka liso sa marijuana, ug tulo ka tabletas sa ecstasy sa ilang mga operasyon sulod sa duha ka bulan ug tunga.
Matod pa ni Davila, ang mga ilegal nga drogas kasagaran isulod gamit ang gagmay nga mga sakyanan sa dagat ug sa mga sakyanan nga moagi sa Cebu-Cordova Link Expressway (CCLEX), nga giilang usa sa mga rota sa mga sindikato.
Gikan sa Abril 1 hangtod Hunyo 15, nakahimo ang PDEA og 236 ka anti-drug operations sa dakbayan sa Sugbo, nga misangpot sa pagkadakop sa 301 ka drug personalities. Ang ilang kampanya batok sa drogras padayon nga gipalig-on uban sa tabang sa mga lokal nga ahensiya ug komunidad.
I via Renante Socia Lada