Aron mas mapalig-on pa ang ilang abilidad sa pagpugong ug pagresponde sa mga krimen, nakadawat ang Cebu City Police Office (CCPO) og dugang nga mga modernong motorsiklo gikan sa Police Regional Office 7.
Karong adlawa, Hunyo 23, 2025, gihatagan ang CCPO og duha ka dugang patrol motorcycles atol sa pormal nga turnover sa Camp Sergio Osmeña Sr., ubos sa pagdumala ni PRO-7 Regional Director PBGEN Redrico A. Maranan. Kini nga mga sakyanan gihatag isip suporta sa misyon sa kapulisan nga mas mapadali ang ilang pagresponde sa mga insidente sa siyudad.
Gawas pa sa bag-ong duha ka motorsiklo, bag-ohay lang usab nga nadugangan og 15 ka Honda 150cc advanced motorcycles ang CCPO alang sa ilang Tactical Motorcycle Riding Unit (TMRU) sa Cebu City Mobile Force Company. Kini nga mga motorsiklo makatabang sa paspas nga pagresponde sa mga lugar nga lisod kasudlan sa dagkong sakyanan.
Nagpasalamat si PCOL Enrico E. Figueroa, Acting City Director sa CCPO, sa suporta nga ilang nadawat. Matod niya, dako kini’g tabang sa ilang paningkamot nga mapadayon ang kalinaw ug kaluwasan sa mga residente sa siyudad.
Kini nga lakang nagpakita sa padayon nga paningkamot sa kapulisan sa Cebu City nga mas maprotektahan ang katawhan ug malikayan ang krimen pinaagi sa modernong kagamitan ug mas paspas nga serbisyo.
I via Renante Socia Lada