Nagmalampuson ang usa ka semana nga operasyon sa Cebu City Police Office (CCPO) ubos sa ilang One Time Big Time Oplan Bulabog nga gipahigayon sugod gabii sa Hunyo 16 hangtod kadlawon sa Hunyo 22, 2025. Hiniusa kini sa Oplan Bakal-Sita ug gipasiugdahan sa tanang police stations sa siyudad, kauban ang lokal nga kagamhanan ug mga force multipliers, aron palig-onon ang kaluwasan sa tanang 80 barangay sa Cebu City.
Sa maong operasyon, 134 ka menor de edad ang na-rescue tungod sa paglapas sa curfew ordinance. Kapin duha ka libo ka mga establisyemento ang na-inspeksyon ug 12 ka indibidwal ang natiketan tungod sa mga kalapasan sama sa panigarilyo sa pampublikong lugar, pag-ihi sa daplin, ug ubang porma sa dili angay nga pamatasan sa publiko.
Lakip sa nadakpan usa ka 39-anyos nga lalaki nga taga-Barangay Suba human masakpan nga adunay ilegal nga drogas. Kapin duha ka gramo sa gituhang shabu ang nakuha gikan kaniya nga nagkantidad og ₱13,600. Ang suspetsado karon naa na sa kustodiya ug pasakaan og kaso ubos sa Republic Act 9165.
Gipasiugda ni Police Regional Office 7 Director PBGEN Redrico A. Maranan ang kamahinungdanon sa presensya sa kapulisan ilabi na sa mga lugar nga taas og krimen. Gipasalamatan usab niya ang tanang kauban sa operasyon ug gipahimug-atan ang papel sa kooperasyon sa komunidad aron makab-ot ang luwas ug malinawon nga Cebu City.
Source: CCPO
I via Renante Socia Lada