Gi-aprubahan sa Provincial Development Council (PDC) Executive Committee ang plano sa paggasto sa Cebu Provincial Disaster Risk Reduction and Management (PDRRM) Trust Fund nga nagkantidad og kapin ₱518.21 milyon, ug giendorso kini ngadto sa Sangguniang Panlalawigan alang sa dugang pag-aprubar.
Sa tigum kagahapon Marso 26, 2026, nga gipangulohan ni Gobernador Pamela S. Baricuatro, giuyonan sa komite ang rekomendasyon sa Provincial Disaster Risk Reduction and Management Council (PDRRMC) nga gamiton ang wala magamit nga pondo sa Local Disaster Risk Reduction and Management Fund gikan sa 2021 hangtod 2025.
Ang maong pondo nga nagkantidad og ₱518,209,481.14 gamiton alang sa lain-laing programa sama sa disaster prevention ug mitigation, disaster preparedness, disaster response ug early recovery, ingon man recovery ug rehabilitation.
Apil sa gastohan ang pagpalit og rescue equipment ug mga gamit, pagbansay sa personnel, sea ambulances, mobile kitchens, emergency land transport assets, ug suporta sa rehabilitasyon sa agrikultura.
Lakip usab ang paghatag og relief goods, suplay, ug temporary shelters alang sa mga apektado sa kalamidad.
Gilauman usab nga gamiton ang pondo sa pag-ayo sa mga dalan, tulay, building, ug pasilidad nga nadaot tungod sa linog niadtong Setyembre 30, 2025 ug bagyong Tino niadtong Nobyembre 4, 2025, uban sa uban pang proyekto sa rehabilitasyon.
Sa wala pa giaprobahan ang plano, gipahinumdoman sa Execom ang PDRRMC nga siguruhon ang pag-andam daan sa mga tabang ug kagamitan aron dali ang responde sa umaabot nga bagyo ug uban pang kalamidad.
Source: Cebu Province PIO
I via Renante Socia Lada