Gidayeg ni Presidente Ferdinand “Bongbong” Marcos Jr. ang kusog nga pag-asenso sa ekonomiya sa Central Visayas, ilabi na sa Sugbo, atol sa iyang pagsulti sa usa ka rally kagahapong adlawa, Mayo 5, 2025, sa lungsod sa Dumanjug, Sugbo.
Matod niya, ang ekonomiya sa Sugbo mitubo og 5.7%, tungod sa padayon nga suporta sa gobyerno sa mga negosyante ug namuhunan. Ang mga programa ug proyekto sa lokal ug nasudnong gobyerno nakatabang sa pagdani og mas daghang negosyo ug trabaho sa lalawigan.
Gitataw usab sa Presidente nga ang Central Visayas adunay 97.1% nga employment rate, nga nagpasabot nga hapit tanan nakatrabaho ug 2.9% ra ang walay trabaho.
Ang Sugbo giila ni PBBM nga nanguna sa pagpalambo sa ekonomiya sa tibuok rehiyon, nga nakatampo sa 7.3% nga pagtubo sa ekonomiya sa Central Visayas.
Ang maong kalamboan nagsilbing timailhan nga lig-on ug masaligan ang ekonomiya sa rehiyon, ug daghan pa ang posibilidad sa negosyo, trabaho, ug kabag-ohan nga makabenepisyo sa katawhan.