Patay ang usa ka lalaki nga ballboy sa tennis court human nga nabangga ang iyang motorsiklo sa likod sa naka-parkung nga trailer truck sa Barangay Colon, Naga City, pasado alas 11:00 sa gabii, Mayo 5, 2025.
Ang biktima giila nga si Joemike Ombao, 34 anyos, taga Barangay Cantao-an sa Naga. Kauban niya sa motorsiklo ang usa ka menor de edad nga lalaki nga nasamdan ug posibleng nabali ang tiil.
Sumala sa imbestigasyon, nagpadulong unta sa ilang balay si Ombao ug iyang kauban, apan wala nila mabantayi ang trailer truck nga nagpundo sa kilid sa national highway nga adunay kargang semento, hinungdan nga nasangit ang ilang motorsiklo sa likod niini.
Gidali og dala sa Naga Health Infirmary ang duha, apan si Ombao gideklarar nga dead on arrival.
Ang drayber sa trailer truck giila nga si Nacianseno Bayarcal Ricardel Jr., 48 anyos, taga Barili, Cebu. Kasamtangang gipaubos sa imbestigasyon ang insidente.
Gipahimangnoan sa mga otoridad ang tanan nga motorista nga magbantay sa kalsada ilabi na kung gabii, ug siguruhon ang hustong kahayag sa ilang sakyanan aron malikayan ang mga disgrasya.
I via Renante Socia Lada