Gidayeg sa Cebu Provincial Board (PB) ang Cebu Provincial Government ubos sa pagpangulo ni Governor Pamela Baricuatro tungod sa malampusong medical ug surgical mission nga gihimo sa Cebu Provincial Hospital–Danao City.
Gipahigayon ang duha ka adlaw nga medical mission isip kabahin sa selebrasyon sa 457th Founding Anniversary sa Cebu Province. Tumong niini nga mahatagan og libre nga serbisyo medikal ang mga Cebuanong nanginahanglan, ilabi na kadtong dili makakaya ang gasto sa operasyon ug konsultasyon.
Gibanabana nga ₱9.5 milyon ang kantidad sa libre nga serbisyo nga gihatag. Lakip niini ang 23 ka major surgeries, 52 ka minor surgeries, 63 dental services, 225 medical consultations, 10 AV fistula procedures, 85 diagnostic services, ug 93 HIV screenings.
Kapin 260 ka doctors, medical professionals ug support personnel gikan sa nagkalain-laing partner institutions ang mitabang sa misyon. Gipasalamat sa Provincial Board ang tanan nga medical workers, volunteers ug partner organizations nga mitampo sa malampusong pagpahigayon sa maong programa.
I via Renante Socia Lada