Gipasabot sa mga opisyal sa Parole and Probation Administration sa Mandaue City ang ilang papel sa hustisya atol sa ilang panag-uban sa radyo program nga Tandem Express, sa RPN DYKC CEBU. Gitambongan kini nila Christian Garan, Senior Probation and Parole Officer, ug Irish Mae Patoc, Supervising Probation and Parole Officer, aron ipaambit ang ilang kahibalo kabahin sa proseso ug mga serbisyo sa ilang buhatan.
Gipasabot nila ang kalainan sa parole ug probation, nga ang probation gitugot sa korte ug gihatag sa usa ka akusado na pwedi niya serbisyuhan gawas sa prisohan basta motuman lang siya sa mga kondisyon sa korte. Samtang ang parole gitugot sa Board of Pardons and Parole ug ihatag kini sa mga napriso nga nakasugod na og silot sa bilanggoan, apan gipagawas na sa sayo nga panahon ubos sa mga kondisyon, isip pribilehiyo tungod sa ilang maayong pamatasan o uban pang rason.
Aron makabenepisyo sa probation, kinahanglan nga mo-apply ang akusado pinaagi sa korte ug mosumite og mga papeles alang sa assessment. Kung maaprobahan, kini adunay kasamang kondisyon nga gisunod sa probationer sama sa pagreport sa probation officer, dili pagbalik sa bisyo, ug pag-apil sa mga counseling o livelihood programs. Ang probation officer nagbantay, nagmonitor, ug nagtabang sa reintegration sa mga probationers ug parolees balik sa komunidad.
Gipatin-aw isab nila nga mamahimong bawi-on ang probation kung masupak sa kondisyon, ug kasagaran nga mosulod kini og 1 hangtod 3 ka tuig nga monitoring, depende sa kaso. Restorative justice usa sa ilang giuyonan nga prinsipyo, diin gitinguha nga dili lang silotan ang nakasala, kundi masabtan usab ang epekto sa biktima ug komunidad, ug matabangan ang nagbuhat og krimen nga makabawi sa iyang sayop.
Gihisgutan usab nila nga aduna silay Volunteer Probation Assistant (VPA) Program, diin ang mga interesado nga boluntaryo mahimong makaapil sa pagtabang sa opisina sa pag-monitor ug paggiya sa mga probationers.
Bukas ang aplikasyon sa ilang buhatan nga nahimutang sa G/F, Hall of Justice Building, P. Burgos Street, Mandaue City. Padayon ang ilang paningkamot sa paghatag og ikaduhang kahigayunan sa mga nakasala ug pag-amuma sa kalinaw ug kaayohan sa komunidad.
I via Renante Socia Lada