Gipaabot sa Cebu City Police Office (CCPO) ang kalampusan sa ilang usa ka semana nga operasyon sa OPLAN BULABOG ug OPLAN BAKAL-SITA nga gipahigayon gikan Hulyo 15 hangtod 21, 2025. Kauban ang mga lokal nga panggamhanan ug force multipliers, gisuroy ang tanang 80 ka barangay sa dakbayan aron mapalig-on ang seguridad ug kalinaw sa komunidad.
Gipangulohan ang operasyon ni Acting City Director PCOL Enrico Evangelista Figueroa, uban ang suporta ni PRO-7 Regional Director PBGEN Redrico A. Maranan. Usa sa mga dako nga kalampusan mao ang pagkahimo og inspeksyon sa 1,551 ka establisyemento nga misangpot sa pagrescue sa 356 ka minor de edad nga nakalapas sa curfew ordinance. Duha usab ang gitiketan tungod sa public smoking.
Upat ka suspetsado ang nadakpan sa nagkalain-laing insidente atol sa operasyon. Lakip sa ilang mga nadakpan mao ang duha ka lalaki nga taga-Barangay Pahina Central tungod sa pagpanag-iya og iligal nga drogas ug armas. Usa ka 24-anyos nga taga-Kalunasan ang nasikop nga may dala nga 0.37 gramos nga gituohang shabu, samtang ang laing 39-anyos sa Kamputhaw nasikop tungod sa iligal nga revolver ug bala.
Sa kinatibuk-an, ang mga kapulisan nakasakmit og 0.43 gramos sa gituohang shabu nga nagkantidad og ₱2,924. Ang mga suspetsado atubang karon sa kasong paglapas sa RA 9165 (Comprehensive Dangerous Drugs Act of 2002) ug RA 10591 (Firearms and Ammunition Regulation Act).
Gipadayag ni PBGEN Maranan nga ang maong operasyon timaan sa padayon nga paningkamot sa PRO7 ug CCPO sa pagprotektar sa katawhan. Gipasidunggan niya ang kooperasyon sa mga ahensya ug komunidad nga nag-uban aron masiguro ang usa ka malinawon, luwas, ug drug-free nga Cebu City.
Source: CCPO
I via Renante Socia Lada