Nagtinguha ang Kagamhanan sa Lalawigan sa Sugbo nga mapalig-on ang pagdumala sa hugaw nga tubig o wastewater human sa pag-apil ni Engr. Aldrin Barade, pangulo sa Cebu Provincial Inter-LGU Waterworks System Office (CPIWSO), sa usa ka pagbansay nga gipahigayon sa Japan pinaagi sa Japan International Cooperation Agency (JICA) niadtong Hulyo 6 hangtod 17, 2026.
Kauban ni Engr. Barade sa maong programa ang mga representante gikan sa Cebu City, Mandaue City, Metropolitan Cebu Water District (MCWD), ug Department of Economy, Planning, and Development (DepDev). Ang pagbansay kabahin sa paghimo og komprehensibong sewerage master plan alang sa Metro Cebu, diin ang Mandaue City maoy pilot area sa proyekto.
Atol sa ilang pagbansay, ilang gisuroy ang mga pasilidad sa pagtambal sa hugaw nga tubig sa Japan ug nakat-on sa mga modernong pamaagi sa paglimpyo sa tubig sa dili pa kini ibalik sa mga suba ug dagat. Ilang nasayran usab kung giunsa pag-usab ang sewage sludge ngadto sa renewable energy sama sa methane ug biofuel aron maminusan ang basura.
Matod ni Engr. Barade, dako ang tabang sa maong pagbansay aron mapanalipdan ang mga suba ug kabaybayonan sa Sugbo. Tungod niini, nag-andam na ang CPIWSO og mga plano ug dugang pagbansay aron mapalig-on ang kahibalo ug abilidad sa mga kawani sa probinsya sa husto nga pagdumala sa hugaw nga tubig.
I via Renante Socia Lada