Patay ang usa ka 11-anyos nga batang lalaki, samtang samaran ang iyang 16-anyos nga igsoong lalaki usab human sila giingong gidunggab sa ilang 28-anyos nga uyoan sa Sitio Habay-Habay, Barangay Candabong, Manjuyod, Negros Oriental, pasado alas 2:30 sa hapon niadtong Domingo.
Sumala sa Manjuyod Municipal Police Station, giingong kalit nga giatake sa suspek ang duha ka magsoon gamit ang 12-pulgadang hunting knife samtang maniudto unta sila sa balay sa ilang apohan. Ang 11-anyos nakaangkon og samad sa tiyan ug gideklarar nga dead on arrival sa Rural Health Unit, samtang ang 16-anyos usab nasamdan apan luwas na sa peligro.
Base sa imbestigasyon, wala na mapugngi sa apohan sa mga biktima ang suspek tungod kay armado kini. Human sa insidente, mipauli ang suspek sa iyang balay ug mitrangka. Sa pag-abot sa mga pulis, wala kini motubag sa ilang pagtawag. Sa dihang gisulod ang balay, ilang nakita nga patay na ang suspek sulod sa iyang kwarto. Gituohang nagpakamatay kini pinaagi sa pagbitay gamit ang pisi.
Padayon pa ang imbestigasyon sa kapulisan aron matino ang tibuok hinungdan sa krimen. Giingon usab sa mga imbestigador nga ang suspek adunay giingong problema sa pangisip. Anaa na sa kustodiya sa kapulisan ang hunting knife nga gigamit sa maong insidente isip ebidensya.
I via Renante Socia Lada and Roy Ortega