Mga binulto sa gituhuang shabu ang nakumpiska sa mga otoridad sa usa ka buy-bust operation ilawm sa Old Bridge, Barangay Pajo, niadtong Lunes sa gabii, Enero 27, 2025.
Ang suspetsado giila sa Lapu-Lapu City Police Office (LCPO) na mao si Regin Rex Oporto Añora, 45 anyos, menyo, residenti rapud sa maong lugar.
Ang gidiling drugas gibana-banang motimbang og usa ka kilo nga adunay street value nga kapin sa Php 6 milyon. Ang operasyon nagresulta sa pagkasikop sa suspek, nga karon anaa na sa kustodiya sa kapulisan samtang gipadayon ang imbestigasyon aron matumbok ang posibleng kauban ug gigikanan sa mga druga.
Personal nga miadto si Mayor Junard “Ahong” Chan aron motan-aw sa nahitabong operasyon. Gipadayag niya ang pasalamat sa kapulisan alang sa ilang padayong paningkamot batok sa illegal nga drugas.
“Ang atong mga otoridad nagpakita og dako nga determinasyon aron mapanalipdan ang atong lungsod. Ang maong kadaugan nagpakita nga seryoso kita sa pakigbatok sa gidiling druga,” matud ni Mayor Chan.
Ang mga kapulisan padayon nga nag-awhag sa publiko nga magpabilin nga mabinantayon ug ireport dayon ang bisan unsang kahibalo bahin sa illegal nga kalihokan aron mas mapadayon ang kalinaw ug kaluwasan sa lungsod. (Renante Socia Lada)