Usa ka makalilisang nga krimen ang nahitabo sa Purok Kamanggahan, Barangay Lutac, niadtong Lunes sa buntag, Enero 27, 2025, diin ang duha ka bata ug ilang inahan gipangpatay samtang sila namahaw.
Ang mga biktima mao si Junelyn Gimenez, 32 anyos, inahan; ug ang iyang mga anak nga sila si Jun Carl Camporedondo, 11 anyos, ug LJ Camporedondo, 2 anyos. Ang suspek mao si Carlo Denata Camporedondo, amahan sa mga bata ug kapuyo ni Junelyn Gimenez.
Gituhuangan nagumon sa shabu ug sugal. Sumala sa mga otoridad sa Naga City Police Station, pasado alas 8:00 sa buntag, samtang namahaw ang mga biktima sa ilang balay, kalit nga gipanigbas sila sa suspek nga si Carlo gamit ang usa ka hait nga sundang.
Ang mga biktima namatay dayon gumikan sa grabeng mga samad. human ang krimen, gilusad sa kapulisan ang hot pursuit operation batok sa suspek, kinsa giingong lumad sa Cabadbaran City, Agusan del Norte, paglabay sa pipila ka oras pasado alas 4:00 sa hapon nasikop kini apan adunay pinusilan sa paa.
Ang kapulisan nagpahimangno sa publiko kalabot sa maong insidente nga nagpakita sa seryosong epekto sa paggamit og ilegal nga drogas sa pamilya ug komunidad.
Ang kapulisan nangayo og kooperasyon gikan sa publiko aron matabangan ang gobyerno sa pakigbatok sa drogas ug pagpakunhod sa krimen. (Renante Socia Lada)