Usa ka Job Order employee sa lungsod sa Carmen ang nakaplagang patay sa usa ka awa-aw nga lugar sa Sitio Ubayon, Barangay Baring, niadtong Lunes, Enero 27, 2025.
Ang biktima mao si Alejandro Villarba Alburo, residente sa Sitio Pasil, Barangay Cogon East, Carmen, ug nagtrabaho isip Job Order employee sa lokal nga kagamhanan sa maong lungsod.
Sumala sa mga imbestigador, si Alburo giingong nawala niadtong Domingo, Enero 26, alas 5:15 sa buntag. Miadto kini sa merkado aron mopalit ug sud-an apan wala na kini nakabalik sa ilang panimalay. Ang iyang pamilya nagreport sa iyang pagkawala human kini dili na maabot sa balay pagkagabii.
Niadtong Lunes, nakaplagan ang lawas ni Alburo sa usa ka awa-aw nga lugar sa Barangay Baring. Hangtod karon, padayon ang imbestigasyon sa kapulisan aron masuta ang hinungdan sa iyang pagkamatay.
Ang mga otoridad wala pa magpagawas og dugang impormasyon bahin sa posibleng motibo ug mga suspetsado nga nalambigit sa maong insidente.
Ang lokal nga kapulisan nangayo og kooperasyon gikan sa publiko alang sa bisan unsang impormasyon nga makapauswag sa ilang imbestigasyon. (Renante Socia Lada)