Cebu City – Gipirmahan na ang Lapu-Lapu Expresway (LLEX) o Skyway project Memorandum of Agreement (MOA) tali sa Lapu-Lapu City Government ug sa project proponents, atol sa 61st Charter Day Anniversary sa syudad, Biyernes, Hunyo 17, 2022.
Gipahigayon ang pinirmahay sa MOA sa Lapu-Lapu City session hall isip highlight sa Charter Day sa syudad.
“Ang atong highlight sa Charter Day would be the signing of MOA of skyway. Mao na atong gipangandoy gyud to solve the problem of the traffic, especially nga na-open na ang atong third bridge. So nalahos na gyud, na realize na gyud,” mensahi ni Mayor Junard Chan.
Gitakdang sugdan ang Skyway project sa sunod tuig 2023 ug gilauman nga mahuman sa tuig 2025.
Kini human sa MOA signing tali sa kagamhanan sa syudad pinaagi ni Chan ug sa LLEX Corp. president Manuel Gonzales.
Mobalor ang maong proyekto ug ₱ 24 billion; lakip sa mga proponents niini mao ang Premium Megastructures Inc., Ulticon Builders Inc., ug MTD Philippines.
Ang maong proyekto pinaagi kini sa public-private partnership.
Magdugtong kini sa 3rd bridge, Cebu-Cordova Link Expressway (CCLEX) ngadto sa Mactan Cebu International Airport (MCIA) nga way gasto ang kagamhanan sa syudad sa Lapu-Lapu. (Jhon Tadlip)
(News & photo courtesy of Lapu-Lapu City PIO)