Malampusong gipahigayon ang 2026 Nutrition Month Culmination sa Barangay Sunog, Balamban karong Hulyo 25, diin naghiusa ang mga opisyal sa gobyerno, kabatan-onan, mga mag-uuma ug lain-laing organisasyon sa usa ka tree planting activity aron ipasiugda ang kahimsog ug pag-atiman sa kinaiyahan.
Gisugdan ang programa pinaagi sa rehistro sa mga partisipante, pag-ampo, pag-awit sa Philippine National Anthem, Balamban Hymn ug NNC Hymn. Gisundan kini sa welcome remarks gikan kang Balamban Mayor Amos Edwin C. Cabahug, nga girepresentahan ni Baltazar Tribunalo Jr. ug ni Dr. Niño Archie S. Labordo sa National Nutrition Council Region 7. Naghatag usab og opening message si Ms. Laarne E. Pontillas, Convener sa SUN Academe.
Sa wala pa ang tree planting, gipahigayon ang orientation sa Department of Environment and Natural Resources (DENR) bahin sa tumong sa kalihokan, mga safety reminders ug hustong pamaagi sa pagtanom og kahoy.
Nahitabo usab ang ceremonial turnover sa “Leaves of Commitment” gikan sa Run for Roots, SUN Youth, SUN Academe ngadto sa Barangay Sunog, isip simbolo sa ilang padayon nga suporta sa pagpanalipod sa kalikupan.
Human sa commitment message ni Barangay Captain Jose Bebelonio Pepito ug sa pledge of commitment sa mga mag-uuma sa Balamban, gipahigayon ang tree planting activity nga gitambongan sa tanang partisipante.
Gitapos ang kalihokan pinaagi sa closing remarks ni Ms. Estee Marie Plunket sa RAFI, uban sa paglaom nga magpadayon ang mga inisyatiba alang sa kahimsog sa komunidad ug pag-amuma sa kinaiyahan.
📸 NNC-7
I via Renante SociaLada