Nakabenepisyo ang 979 ka molupyo sa Barangay Bacayan, Cebu City sa “Serbisyong Tinabangay: Serbisyo Caravan 2.0” nga gipahigayon sa Cebu City Police Office (CCPO) uban sa Cebu City Government, Mactan Cebu Lions Club, ug uban pang ahensya sa gobyerno. Ang kalihokan gihimo sa Barangay Bacayan Gymnasium sa nakalabay nga adlaw, aron mapaduol sa katawhan ang mga serbisyo sa gobyerno.
Naghatag ang nagkalain-laing ahensya og libre nga serbisyo sama sa civil registration, healthcare, social security, PhilHealth, tabang sa pagpangita og trabaho, serbisyo sa buhis, professional regulation, public safety, skills training, ug uban pang frontline services nga mapuslanon sa mga residente.
Sa mga ahensyang miapil, ang Philippine Statistics Authority (PSA) maoy adunay pinakadaghan nga naserbisyohan nga 310 ka tawo. Gisundan kini sa SSS nga adunay 156 ka kliyente, VisayasMed Hospital nga 139, PhilHealth nga 116, ug PAG-IBIG Fund nga 50 ka benepisyaryo.
Miadto usab sa maong serbisyo ang NAPOLCOM, AFP, SSI Philippines, BIR, PNP, Philippine Coast Guard, TESDA, PRC, BJMP, DOLE, ug CIAS aron mohatag og lain-laing serbisyo ug tabang ngadto sa mga lumulupyo sa barangay.
Sumala sa CCPO, ang kalampusan sa “Serbisyong Tinabangay: Serbisyo Caravan 2.0” nagpakita sa lig-on nga panaghiusa sa kapulisan, lokal nga gobyerno, ug ubang mga ahensya sa paghatod og kalidad nga serbisyo ngadto sa katawhan. Tumong sa maong programa nga mapadayon ang episyente ug duol nga pag-alagad aron mahimong mas luwas ug mas lig-on ang komunidad.
📸 CCPO
I via Renante Socia Lada