Nadakpan sa mga operatiba sa City Drug Enforcement Unit (CDEU) sa Cebu City Police Office (CCPO) ang usa ka iladong drug pusher atol sa malampusong buy-bust operation sa Sitio Estacionan, Barangay Mabolo, Cebu City alas 6:35 sa gabii sa Mayo 17, 2026.
Ang operasyon kabahin sa padayon nga kampanya batok sa ilegal nga drogas ug sa implementasyon sa Simultaneous Anti-Criminality Law Enforcement Operations o SACLEO.
Sa operasyon, narekober gikan sa suspetsado ang duha ka ₱100 nga gigamit isip buy-bust money, usa ka gamay nga sachet sa gituohang shabu nga gibaligya ngadto sa poseur buyer, ug daghang sachet ug pakete sa gituohang shabu nga iya matod pa gitipigan.
Lakip usab sa nakompiskar mao ang ₱400 nga gituohang halin sa ilegal nga drogas ug usa ka coin purse nga gisudlan sa mga ebidensya.
Sumala sa kapulisan, mokabat sa 30 gramos ang total timbang sa nakuhang gituohang shabu nga adunay standard drug price nga mokabat og ₱204,000.
Ang nadakpang suspetsado gidala sa custodial facility sa Cebu City Police Office ug kasamtangang gitanggong samtang giandam ang kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.
Matud pa sa CCPO ubos sa pagpanguna ni City Director PCOL George V. Ylanan, magpadayon ang ilang kampanya aron masumpo ang ilegal nga drogas ug mapadayon ang kalinaw ug kaluwasan sa dakbayan sa Sugbo.
I via Renante Socia Lada