Nasikop sa kapulisan sa Waterfront Police Station 3 ang usa ka lalaki nga giila lamang sa alyas nga “JP” tungod sa ilegal nga pagpanag-iya og armas sa Barangay Tejero, Cebu City.
Ang pagdakop gihimo alas 6:25 sa gabii sa Mayo 17, 2026 atol sa padayon nga kampanya sa kapulisan batok sa ilegal nga armas ug kriminalidad ubos sa Simultaneous Anti-Criminality Law Enforcement Operations o SACLEO.
Sumala sa report, midali og responde ang mga pulis nga gipangulohan ni PCAPT Michael T. Sevilla human makadawat og sumbong mahitungod sa usa ka armadong tawo sa Sitio Daclan, Barangay Tejero.
Sa ilang pag-abot ug pag-imbestigar, nadakpan ang suspetsado nga adunay dala nga usa ka caliber .38 revolver nga adunay sulod nga usa ka buhing bala.
Human sa operasyon, gidala ang suspetsado sa kustodiya sa Police Station 3 samtang giandam ang kaso batok kaniya tungod sa paglapas sa Republic Act 10591 o ang Comprehensive Firearms and Ammunition Regulation Act.
Gipadayag usab sa Cebu City Police Office nga magpadayon sila sa ilang kampanya batok sa ilegal nga armas aron mapadayon ang kalinaw ug kaluwasan sa syudad ubos sa pagpanguna ni CCPO Director PCOL George V. Ylanan.
I via Renante Socia Lada