Gipahibalo sa National Grid Corporation of the Philippines (NGCP) nga adunay Red Alert sa Visayas Grid gikan alas-5:00 sa hapon hangtod alas-8:00 sa gabii karong Agosto 27, 2026.
Adunay Yellow Alert gikan alas-2:00 sa hapon hangtod alas-5:00 sa hapon, ug usab gikan alas-8:00 hangtod alas-9:00 sa gabii.
Base sa update alas-8:00 sa buntag, 2,344 megawatts (MW) ang available nga suplay sa kuryente, samtang ang peak demand gibanabana nga moabot sa 2,452 MW.
Matud sa NGCP, usa sa mga hinungdan sa alert status mao ang wala paggana sa dagkong coal plants sa Visayas nga TVI 1, TVI 2 ug KSPC 1, lakip ang limitado nga power import gikan sa Mindanao.
Adunay 9 ka power plants ang naka forced outage ug 16 ka planta nga nag-operate sa ubos nga kapasidad, nga miresulta sa kinatibuk-ang 916.2 MW nga dili magamit sa grid.
Ang Red Alert ipagawas kung kulang ang available nga suplay sa kuryente aron matubag ang panginahanglan sa mga konsumidor ug kinahanglanon sa transmission grid.
Samtang ang Yellow Alert ipagawas kung dili igo ang operating margin alang sa contingency requirement sa grid.
I via Renante Socia Lada