Gipahigayon sa National Grid Corporation of the Philippines (NGCP) karong Huwebes, Hulyo 2, 2026, ang “Power 101” seminar sa Bai Hotel sa Mandaue City. Gitambongan kini sa mga resource speakers tigbalita gikan sa nagkalain-laing bahin sa nasud aron mapalambo ang ilang kahibalo sa industriya sa kuryente ug sa papel sa NGCP sa nasudnong power grid.
Sa seminar, gipatin-aw sa NGCP ang tibuok power supply chain—gikan sa power generation diin gihimo ang elektrisidad, ngadto sa transmission nga maoy responsibilidad sa NGCP pinaagi sa ilang high-voltage transmission lines, hangtod sa distribution utilities nga maoy nag-apod-apod sa kuryente ngadto sa mga balay, negosyo, ug ubang konsumidor.
Gipasabot usab ang kalainan sa responsibilidad sa mga power generators, NGCP, ug mga electric distribution utilities aron masabtan sa publiko ang tagsa-tagsa nilang buluhaton.
Usa sa labing dakong gihisgutan mao ang grid stability ug grid operations. Gipakita sa NGCP kung giunsa nila pagmonitor sa suplay ug panginahanglan sa kuryente sulod sa 24 oras matag adlaw pinaagi sa National Grid Control Centers aron mapabiling balanse ang sistema ug malikayan ang dagkong pagkawala sa suplay sa kuryente. Gihisgutan usab ang mga hinungdan sa transmission outages, preventive maintenance, ug ang mga lakang nga gihimo aron masiguro ang kasaligan nga serbisyo bisan panahon sa bagyo ug uban pang kalamidad.
Gihatagan usab og update ang mga partisipante bahin sa mga kasamtangang transmission projects sa Luzon, Visayas, ug Mindanao. Lakip niini ang pagpadali sa mga transmission line projects, substation expansion, transmission line clearing program aron malikayan ang sagabal sa mga linya sa kuryente, disaster preparedness ug recovery operations, ingon man ang kahimtang sa Mindanao-Visayas Interconnection Project (MVIP), nga nagpalig-on sa koneksyon sa power grids sa duha ka dagkong isla aron mas episyente ang pagbalhin sa suplay sa kuryente.
Matud sa NGCP, ang “Power 101” kabahin sa ilang kampanya sa pagpalambo sa energy literacy ug transparency. Pinaagi niini, gilauman nga mas masabtan ang operasyon sa transmission network aron mas husto ug mas klaro ang ilang mahatag nga impormasyon sa publiko bahin sa kahimtang sa suplay sa kuryente, mga proyekto sa NGCP, ug mga isyu nga makaapekto sa power sector sa nasud.
I via Renante Socia Lada