Gipasiguro sa kapulisan sa Negros Oriental ang kaluwasan sa liboan ka delegado sa 2025 Central Visayas Regional Athletic Association (CVIRAA) nga ipahigayon sa Marso 11 hangtod 16 sa Bayawan City.
Sumala ni Lt. Stephen Polinar, tigpamaba sa Negros Oriental Police Provincial Office (NOPPO), 300 ka police personnel ang gibutang sa Bayawan City ug kasikbit nga mga lungsod niadtong weekend aron mabantayan ang mga venue sa dula ug ang mga billeting quarters.
Ang Bayawan-Sta. Catalina campus sa Negros Oriental State University (NORSU) ang nag-unang venue sa kompetisyon, samtang 33 ka billeting quarters ang gitudlo sa Department of Education (DepEd) alang sa mga partisipante.
Ang mga aktibidad ipahigayon sa nagkalain-laing dapit sa Bayawan City, Sta. Catalina, ug Basay.
Aron masiguro ang kahapsay, magbutang og police assistance desks, ug magpahigayon og regular foot ug mobile patrols sa tanang venue sulod sa kompetisyon. Pipila sa mga atleta, coach, ug uban pang delegado nakaabot na sa Bayawan City niadtong weekend.
Ang pagsugod sa CVIRAA 2025 ipahigayon karong Martes, Marso 11, sa alas-3 sa hapon sa NORSU Bayawan-Sta. Catalina campus, uban ang mga dagkong opisyal sa DepEd ug uban pang ahensya sa gobyerno.
Kini nga rehiyonal nga torneyo magtigum sa mga atleta nga nagrepresentar sa Cebu, Bohol, Negros Oriental, ug Siquijor, ingon man sa lain-laing mga siyudad sa Central Visayas. (Renante Socia Lada)
(Source: PNA)