Gipahibalo ni Police Brigadier General Redrico A. Maranan, Regional Director sa Police Regional Office 7 (PRO7), ang malampusong pagsikop sa tulo ka gun-for-hire groups nga responsable sa mga madugong krimen sa Sugbo.
Ang duha sa maong mga grupo, ang Ylaya Group ug Tañeza Group, nga nalalbigit sa daghang pagpamusil sa Cebu City niadtong Pebrero, napamatud-an nga nag-operate ilawom sa usa ka handler—usa ka ex-convict nga nadakpan na niadtong Pebrero 17, 2025. Samtang ang ikatulo nga grupo, ang Bano Group, nga nagpaluyo sa pagpamusil sa Toledo City niadtong Marso 5, 2025, naglihok nga independente.
Sa nagpadayong operasyon sa kapulisan, walo (ka mga suspek ang nasikop samtang usa ka myembro sa Bano Group ang napatay human nakig-engkwentro sa kapulisan atol sa pagpangdakop sa Toledo City.
Gawas sa mga nadakpan, usa ka menor de edad nga gigamit sa krimen sa Tañeza Group ang naluwas sa mga awtoridad. Giseguro sa kapulisan nga nasunod ang tanang proseso sa pag-atiman sa maong minor de edad, nga gipaubos sa hustong pag-atiman ug proteksyon pinaagi sa mga ahensiya sa gobyerno.
Ang mga insidente sa pagpamusil sa Cebu City naglakip sa kamatayon sa usa ka biktima niadtong Pebrero 2 sa Sitio Riverside, Barangay Duljo Fatima, ug laing pagpamusil niadtong Pebrero 11 sa Sitio San Juan, Barangay Mambaling. Samtang ang insidente sa Toledo City niadtong Marso 5 mipakita sa nagpadayong hulga sa mga gun-for-hire nga grupo sa Sugbo.
Tungod sa padayong police operations, napasakaan og kaso ang mga nadakpan ug ang uban kanila na tugyan na sa Bureau of Jail Management and Penology (BJMP).
Nakakumpiska usab ang kapulisan og siyam (9) ka pusil ug 166 ka gramos nga shabu nga nagkantidad og Php1,128,800.00, gikan sa maong mga grupo.
“This operation underscores our firm resolve to dismantle criminal networks that endanger public safety. The successful arrests, along with the rescue of the minor, demonstrate our commitment to protecting communities and ensuring justice for victims,” matod ni PBGen Maranan.
Gidayeg usab ni Brig. Gen. Maranan ang Cebu City Police Office ug uban pang yunit sa kapulisan tungod sa ilang paspas ug tinabangay nga operasyon.
Padayon pang giimbestigahan sa kapulisan ang kalabotan sa mga grupo, ug gipaabot nga adunay dugang pang mga sikop samtang gipakusgan ang kampanya batok sa mga gun-for-hire nga grupo sa Sugbo. (Renante Socia Lada)
(Source: PRO7- PIO)