Gitakdang hisgutan ni Mayor Raymond Alvin Garcia ug sa kapulisan sa dakbayan sa Sugbo ang posibilidad sa pagpatuman og curfew sa tibuok siyudad.
Kini napukaw nga diskusyon human sa pagkasikop sa walo ka mga lalaki nga gipasanginlang miyembro sa gun-for-hire groups nga nalambigit sa sunodsunod nga pagpamusil sa syudad.
Sumala ni Police Brigadier General Redrico Maranan, regional director sa Police Regional Office-7, ang nadakpan nga mga lalaki sakop sa duha ka gun-for-hire nga grupo nga aktibo sa dakbayan sa Sugbo sa naglabay nga mga semana.
Nagtuo ang kapulisan nga sa ilang pagkadakop, mominus na ang mga insidente sa pagpamusil sa siyudad ug sa ubang dapit sa Kabisay-an.
Atol sa iyang senemanang press conference karong Marso 10, 2025, gibutyag ni Mayor Garcia nga daghang barangay ang may kaugalingong curfew ordinances, nga nagkontrolar sa paggawas sa menor de edad sa gabii.
“You know for a fact that some barangays have already curfews…. That is something we will have to discuss… when I have a command conference this month (with the police), kay wa na maapil sa akong agenda,” matud ni Mayor Garcia.
Giklaro niya nga kung ang matag barangay nag-iyahay og curfew, tukion nila sa kapulisan kung angay ba nga ipatuman kini sa tibuok siyudad.
“If there is necessity, we have to implement a city-wide curfew. And that is something we will have to discuss with the Philippine National Police and other law enforcement agencies in our next meeting,” dugang pa niya.
Gilauman nga sa umaabot nga command conference sa mayor ug kapulisan, tukion ang tanang aspeto sa curfew implementation aron masiguro ang kalinaw ug seguridad sa dakbayan. (Renante Socia Lada)
(Source: Cebu City PIO)